永遠忘記唔到2023年12月如何收18:00飛奔去上環坐船過大海睇20:00，平安夜嗰晚挑戰放19:30睇21:00勁擔心趕唔切開場，但個晚出現突發狀況遲開騷，叫順利趕得切。除夕更加係亡命之旅返工再趕去澳門完騷又趕返香港接近4:00，第二日返9放6收工再去叱咤到慶功完2:30，之後4:00 返到屋企，所幸有得瞓下先再返工。 當以為呢場過大海之旅完結嘅時候，收到加場消息縱有不解和無奈，因為主題係Dahlia Blossom，有The Prime Classic 冇嘅元素，所以都仍然買飛支持，今次比起TPC睇少咗，依然係工作問題，唔返寫字樓真係冇週未放假。只能工作行先選擇睇嘅日子2025年先啱啱1月過半，自己身體唔爭氣，一病就病咗半個月，18號尾場當日仍然咳到甩肺，唔係感冒咳係氣管唔舒服，一直覺得喉嚨痕，焗啲又咳凍啲又咳，唔咳到反胃流淚都唔停，又怕係會場控制唔到咳影響到人，真係對當日坐我附近嘅大家講聲對唔住，可能比咗你哋一個唔太好嘅體驗🙏🏻 呢個真係既辛苦又忙碌嘅旅程。終於畫上咗完美句號，我哋下次約定紅館見好冇？