你問我，我由細到大，都無「仇富」嘅心態。 睇富二代、富三代啲花邊新聞，我都會好奇八卦追，但我唔會幸災樂禍，因為酒色財氣係佢哋應份嘅。 啲人會話：「佢老豆/阿爺有米，先淨落咁多之嘛！」咪就係咁囉！ 就好似今期爆紅嘅馬氏家族，佢嘅發跡史唔知有幾多人留意到，我都係偶然睇新聞先知，原來佢伯爺喺67暴動之後大手買地，後來水漲船高，升價百倍，公司仲上埋市。 喂，67暴動之後夠膽買重貨，抵佢贏㗎喎，我真心佩服佢咁有膽識！即係換轉喺2025你敢瞓身買樓嘅話，話唔埋你啲仔呀孫呀都可以日日玩車玩女，躺平唔係你發達嘅終極目標咩？然後成班網軍酸民世世代代仲住緊簡樸房喺鍵盤前打飛機。 你可能會話：「萬一香港玩完咪仆街囉！」係㗎，但正如當年邊個有水晶球預測到67暴動之後香港會變成點？或者當時你阿爺同依家嘅你都做緊同一樣嘢，就係笑入市嘅人戇鳩呢。 姑勿論人哋係咪死好命，但最起碼都要有第一桶金先，機會係留俾有準備嘅人。無一個年代嘅香港人成功係容易嘅，今時今日都有好多人炒股炒幣致富㗎，又唔見你係？ 一方面笑緊啲上流人士淨係識食玩瞓屙，另一方面又呻緊幾千蚊卡數仲未還，邊個可憐啲？今晚早啲瞓啦，聽朝準時返工。