失咗業8個月，由一開始嘅雄心壯志、到曾經嘅心灰意冷、到而家嘅見步行步；同個女分開咗8個月，心路歷程同失業一樣。支撐自己每日生存嘅動力就係搵到嘢做，就有錢有能力自己攞番個女。每次諗起、提起個女、睇番啲相，個心都好痛，啲眼淚都係不停流出嚟。自我安慰好多次，佢仲細，唔會有咩心理陰影，唔會因為無咗阿媽就傷心，佢已經習慣無我喺佢身邊。反而唔敢見佢，好怕走果陣見到佢喊，好怕佢望住我哀怨嘅眼神，好怕見完佢自暴自棄好耐嘅自己。 原來失戀唔係最痛，原來失業並唔可怕，最痛係失去個女，最可怕係唔可以喺佢身邊。 每個人都同我講我無能力自己養佢湊佢，我好憎自己好恨自己生咗佢，點解我嘅錯要佢承受？每個人都話我放手係最好嘅結局，點解親生阿媽唔要佢先係對佢最好？