今時今日一套電影要喺香港好票房，通常都有幾個條件 1) 演員同重要單位起碼唔好趕客，以而家嘅標準係觀感上越有大陸色彩越趕客，子華神、張繼聰、劉俊謙、古天樂、林峯、Sammi、Stephy、鄭伊健呢啲感覺都係本土演員，個spectrum慢慢大陸化就係劉德華、楊千嬅、大灣仔、陳偉霆，再去到真係大陸演員。呢個位好多時候都係觀感上，有啲人拗邊個邊個都成日上大陸，但佢俾人覺得冇咁大陸化就係冇咁大陸化🤔 2)要有強大message，有野想表達，或者要係象徵緊一種精神。而呢種精神最好係呼應緊呢代香港人內心需要，而家打感動同共鳴係最易有市場，純商業片啲人會寧願等Netflix。 3)要強大口碑，睇完之後網絡要好多人吹奏好有得著，好感動，好受鼓勵。俾人話爛就少好多人睇，俾人話有洗腦嫌疑直頭會俾人抵制。最好係有啲位俾人吹下背後訊息，好似城塞呢套武打戲都流傳有好多象徵意義嘅解讀。 搞搞下香港人睇戲似係搵緊精神安慰同支持，多過需要娛樂。最大鑊係拍俾香港人睇嘅片，香港人有共鳴，其他地方嘅人未必有，仲分分鐘會抵觸大陸嘅思想，但冇共鳴香港人又唔會睇，而家要搵一個angle食到幾家茶禮真係好難。🤔🤔