開始聽舊歌，然後YouTube就源源不絕咁推堆舊歌我聽。 《隨時行樂》係細個聽903聽到跟住好鍾意嘅一首歌，華星時代嘅梁漢文。 細個放學返屋企就即刻做功課，因為唔俾開電視，所以我地就會開收音機聽住嚟做功課，就喺嗰陣識咗唔少廣東歌，903真係sort of塑造咗我部份嘅音樂品味。 前排同個20頭嘅網友傾咗陣音樂，講起大家透過啲咩渠道去聽歌。我同佢講，我地嗰個年代鍾意流行音樂嘅朋友們多多少少對電台DJ呢個職業都有啲Fantasy，佢話佢同身邊啲同學都對呢個職業無咗憧憬，有大把地方可以搵歌聽。 我無再同佢延續討論呢個話題，但確實係有啲感觸，年代唔同諗法果然唔同。 只係點講好呢。 雖說依家聽歌係好方便，打開Streaming咩都有，但當我偶爾打開電台聽到DJ喺度播一首我喜歡嘅歌，嗰種帶點冥冥嘅浪漫始終好打動我。 還是喜歡某些老派浪漫。