《好驚友誼被結束》 ⁡ 我患有系統性紅斑狼瘡症13年，5年前又確診咗個罕見病，生活出現咗翻天覆地嘅轉變，而轉變帶嚟嘅可能係關係嘅結束😟💔 ⁡ 記得我病嘅頭7、8年，個病成日復發，導致我每次住院都要住好長時間。有時有啲約會明明應承咗人，feel到對方好期待個約會，但我臨門一腳入咗院，令對方好失望😔當然我知道自己嗰刻嘅身體狀況係需要入院處理，但我又真係放咗人哋飛機，呢個感覺好複雜、好矛盾！ ⁡ 有啲友誼就係因為咁樣慢慢丟淡咗……甚至被結束咗，一向好重視友誼嘅我真係會有啲傷心😭😭 ⁡ 所以而家嘅我特別珍惜每次可以同朋友出街嘅機會，因為你唔知呢段關係會唔會結束，又或者幾時結束！內心有好多嘅恐懼，驚對方覺得自己煩、想同我結束關係😟 ⁡ 尤其以前SLE上腦，我個人好亂，會成日send嘢/打電話俾身邊嘅朋友，我唔知自己講過咩、做過啲咩，我淨係知道當我恢復正常狀態嘅時候，友誼就悄悄咁結束咗，冇人話俾我聽我究竟衰咗喺邊度，就覺得特別傷心😢💔 ⁡ 有得揀我都唔想病，邊個唔想自己健健康康？邊個會想成日入院、成日打針食藥？ ⁡ 其實病人真係好需要關心同陪伴，但有啲關係真係回不去，唯有好好珍惜而家擁有嘅友誼☺️👭🏻