細個住公屋，見到同學住私樓，日日有零用錢，仲年年暑假去旅行，係羨慕嘅。而我最印象深刻係，小學老豆帶我哋全家去過一次海洋公園，因為坐船，嗰時仲有集古村，已經覺得自己去咗外國咁，記得依家。 一直都係住大西北，上大學前都好少出旺角，自小就有個迷思覺得住九龍嘅人好威，係一種情意結。大個買樓都係喺返新界區，幾年前終於可以喺油尖旺插旗，圓夢。 大學無住宿，情願日日返屋企，搭車來回三個鐘。但我開心嘅，因為我覺得同父母一齊嘅日子唔會淨返好多，我要好好珍惜。 O camp無參加，連畢業禮都無去，因為我唔慣咁多人，我係事後先去辦事處攞返張證書。你問我有無後悔？我又無，再重新嚟過我都會一樣。 自細就成日聽「百萬富翁」，代表有錢人，但我第一份工得五千蚊，感覺好遙不可及。直至廿到尾，有次見到戶口進帳七位數字，先驚覺原來我都係喇喎！ 結婚我係單純去簽名，無婚紗，無觀禮。嗰日上晝車完老豆去餵狗，下晝就去婚姻註冊處，淨係叫咗我老細同我細佬兩個做證婚人就算。 我朋友唔多，有幾個中同會保持聯絡，甚至有個係小同，維繫到幾十年友誼，我已經覺得好難得。 數吓數吓都過咗半世人，算係比上不足、比下有餘，我好滿意㗎喇。