前嗰排同啲學生交流，我哋就講到AI嘅應用。我發現原來好多人用AI嘅原意同我想像中係好唔同。無可否認ChatGPT或其他AI令我哋生活快捷同埋簡單好多，但係我哋要諗吓到底點樣先可以善用而唔係濫用AI。 簡單嚟講，我覺得係分兩種諗法。第一，到底用AI係因為懶，啲嘢好悶而用呀，定係第二，係因為方便自己工作，但係同時又學緊嘢呢？ 呢度最大嘅分別就係如果係因為懶，啲嘢好悶，其實係傷害緊自己，尤其係junior，因為其實唔係學緊任何嘢。但係當我係比較有經驗嘅時候，我用AI係可以將我嘅時間更好咁利用，簡單嚟講AI就好似我嘅員工咁，幫我處理啲對我個人發展無乜幫助嘅嘢，咁其實係好嫁喎。 有啲學生分享話佢哋寫信寫CV甚至寫essay嘅時候會用AI去寫，然後自己去改。呢個方法我認為係本末倒置。作為junior，最重要嘅係去學習，包括呢啲看似tedious又無意義嘅task。有好多人都忽略左其實呢啲task雖然悶，睇落又無意義，但係對你嘅根基係必要嘅。先唔講technical層面，最基本語言同理解能力，同埋drafting skills，都可以通過呢啲task去提升。如果太早行捷徑，可能會得不償失。