原來好多人唔信2003年嘅fresh grad人工得5千，平行時空嚟。 我嘅真實經歷，2000年我考完AL搵到份文員長工，月薪5千，後來大學收咗就無再做。2003年畢業，正值沙士，第一份工都係5千，文職嚟。 我係過咗好多年先上到過萬，我做senior時人工仲低過我條𡃁。點解我會知？因為年尾我有份加佢人工嘅。 遇到呢啲情況，相信9成人都會唔忿氣，但我係完全無嘅，因為我自知生不逄時，我只係大時代下其中一粒犧牲品，不幸嘅人比比皆是。你改變唔到歷史，但你可以創造未來，與其嘥精神怨天怨地，不如積極啲計劃人生，我起步慢但我行得快吖。 就係咁，喺別人嘲笑我睇好嘅情況吓，我買咗樓，再過多幾年我又買多間出租。嗰時樓市仲係麻麻，不過我諗通咗一點，就算跌，蝕嘅都係租客錢，但如果升，我就又食又拎。 同我老公講開，佢係90年代已經出嚟打工嘅藍領，佢話佢第一份工好奀，得7千，我笑咗。 再講，佢話佢𡃁仔嗰時中過六合彩，有5萬蚊獎金，不過年少無知一嘢洗晒。佢好後悔：「嗰時5萬已經可以俾首期。」我話：「我第一層樓都係俾5萬，但我無中六合彩，我係窮到碌卡借住先嘅。」 唔好問我點做到，已經係廿幾年前嘅事。