「你低B架？！仲咁大反應！」Miss佢狀想打我，佢左顧右盼，好怕隔牆有耳，然後再壓低把聲同我講：「佢比學校知道咗會好麻煩架！所以我點敢同你解釋喎！呢啲嘢愈少人知愈好嘛！」 「而家社會開放咗咁多，點會仲歧視人搞基架？」 Miss反一反白眼：「第一好多老師都仲係好保守，包括校長。第二，家長唔接受先係最大問題！你諗下，周Sir件事燒到今日呀。然後呢間男校請咗個Gay嘅老師，即使我信佢、你都信佢，全校學生都信Alex。家長覺得有問題就係有問題！」 Miss無奈咁搖頭，繼續講：「我地做老師嘅，24小時都要揹住道德嘅枷鎖。以前社會嘅家長會好尊重老師，但我地呢一代已經唔係。老師最怕邊個？唔係校長，係家長呀！就好似周Sir呢件事，連校長都驚家長，因為好影響收生呀！其實唔好話同性戀啦，日我同你嘅事⋯⋯比家長知道咗⋯⋯唔只我有事，我驚到時你都有事。」 Miss一面擔憂望住我，個腦諗緊好多擔憂嘅事情。我同佢拍咗拖兩個幾月，或多或少學識諗嘢成熟啲，以前我可能會講：「算啦！理得人點諗！」但今日唔同，特別我知佢背負住好多責任時，我就唔可隨便同佢講「算！」或「睇開啲！」。