最近喺樂富某間酒樓食晚飯，成個晚市得十幾枱客，感受到員工都好努力去做好服務。雖然食物質素一般，但經理不停畀優惠，價錢都算實惠。咁嘅情景，真係令人唏噓 但最近我又去咗太子同油麻地嘅幾間點心店，完全係另一個世界！平日中午都要排隊等位，仲要好多遊客專登慕名而來。咁樣一比較，就知其實唔係冇生意，而係市場已經改變咗，再用以前嘅思維同方法去經營就死得 淺淺分析下點解間酒樓會做到咁慘：首先係產品線混亂，周身刀張張利即係無張利。武林高手只需要一招制敵，但係佢哋就咩都做，結果樣樣都半桶水冇自己特色。第二係地點老化，以前樂富商場吸引到好多住畢架山嘅高消費客群，但而家啟德又開左新商場，加上本身商場裝修老化同租戶檔次下移，都令到吸引力大不如前 反觀點心店有咩值得借鑒？首先係效率高，唔使好大空間擺大枱，格局可以密集啲，一張枱可以做更多生意。第二係成本低，因為專注同一類菜式，流轉率高，採購量大，食材損耗更低，成本可以控制得更好 總結返，用八個字就可以講晒：獨沽一味，降本增效。與其一百種招式練一次，不如同一招練一百次。當然唔係叫啲酒樓老闆改行去開點心店，而係想講目前嘅市場環境已經唔再需要咁多普普通通嘅酒樓