當全街都係藍芽無線耳機嘅時候，我依然鍾情於用有線耳機。有冇人明？ 而家藍芽耳機普及程度之誇張，係連街市買餸阿婆都個個戴緊airpods (山寨版？)。有時都幾好奇佢哋耳筒入面播緊咩，係流行曲？粵曲？電台？孫仔兩年前錄畀佢嘅嗰條voice note？定其實純粹係潮流嘅身份象徵，好似一街唔係戴喺頭嘅頭戴式耳機噉？ 我覺得出街聽歌都要有儀式感，而我嘅儀式感就係繑返開嗰條打晒棘嘅耳機線。有時繑得完嚟，隔離嘅人都聽咗半首歌。但呢種「唔夠方便」嘅感覺，反倒令我覺得生活比較有意思。 再延伸討論落去，聽歌發燒友追求緊耳機嘅高中低音、主動被動降噪、銅線銀線、動圈動鐵、單元⋯⋯再講落去我都已經唔識。我尤其怕嗰啲降噪耳機，因為會令我完全沉浸喺音樂入面，反而忽略咗現實身邊嘅風景、聲音、氣味。每次行街戴耳機聽歌，彷彿就注定要錯過某啲一去不復返嘅有趣人事物。 所以就算聽歌，我都鍾意用聽歌界公認漏音之最嘅嗰隻iphone原廠有線耳機。哪怕係聽緊歌，一旦俾我偷聽到隔離鬧交，我都可以除低耳機，一路扮若無其事，一路窺探嗰對情侶嘅感情狀況。 於是近排我諗，不如極端啲：出街唔准戴耳機聽歌，好好噉聽下呢個世界。