順豐哥哥惹的禍（上）： 話說就嚟新年， 咁梗係要買啲過年食品啦。 我公司就每年都會訂一次花花邦妮爆谷， 呢隻爆谷真係好好食， 送親俾人，個個都話好味。 之前我就通常喺官網訂， 但係發覺運費就好貴， 今次我就喺Carousell嗰度， 搵到個台灣代購， 發現運費會平啲。 咁我就同個代購訂咗20包爆谷， 運費到付。 代購寄出嘅時候通知我， 話佢分咗四張單四箱寄出， 嗰吓我覺得有啲奇怪， 四箱都可以一張單啫， 點解要分四張單呢。 不過唔緊要，問題唔大。 第二日，我返到公司， 同事話俾我聽爆谷到咗， 我見到得兩箱，Check完之後， 發覺仲有兩箱未到。 咁我負責計數， 所以就問返個同事運費幾錢， 我一次過俾晒錢之後， 再問其他人收返錢。 同事話俾我聽運費$55 ， 我聽完之後好驚訝， 😱咁平嘅咩？ 我見個箱上面寫住$55， 但我收到兩箱，唔係應該$110咩？ 同事堅持話個順豐哥哥淨係問佢收咗$55 ， 咁$55就$55 。 跟住我就以為，之後嗰兩箱都係$55， 所以雖然未收到另外嗰兩箱， 但我就計返每包$51， 問同事收咗錢， 跟住派咗已經到咗嘅兩箱俾同事， 等埋剩返嗰兩箱再派埋比其他人。