<你仲後生 大把時間> 作為一個90後 見到父母嘅年代 30歲前就已經生咗兩三個小朋友 40幾歲可能仲係返緊第一份工 好後生就好似被家庭或者份工捆綁住 連好多上一代都自己咁覺得 所以到咗我哋Gen Y Gen Z呢一輩 好多人都會鼓勵我哋take your time 唔使急 慢慢探索 考慮清楚先做決定 好多長輩更加會同我哋講 “你仲後生 大把時間” 呢句說話我由入大學前揀科開始聽 “讀咩科唔緊要 到時都可能做第二行“ 到大學畢業搵工又聽 “頭一兩份工拎經驗 睇下自己對咩有興趣” 到做咗幾年嘢想轉工繼續聽 “30歲前轉行冇所謂㗎 你仲有30年發展” 到而家三十幾歲都仲有老闆同我講 “慢慢嚟啦 30歲事業先開始起步” 呢句鼓勵嘅說話本身係出於好意 但係不知不覺就令到我哋誤以為 人生真係有無限時間 可以不斷俾我哋去試 冇錯 機會係幾時都有 但係人係世上嘅時間有限 如果拖拖下又一個月 唔經唔覺又一年 唔好到45 50歲嘅時候先突然發覺 原來人生已經過咗一半有多 希望大家唔好再覺得自己仲後生 仲有大把時間 相反 諗下自己仲有幾多時間淨低 咁樣諗或者仲會更加可以鼓勵自己