內觀嘅one hour時段 （目前我每日可以做到嘅上限） 讓我有一個絕對（相對）寂靜嘅時去梳理煩亂、躁動不安嘅內心，一件一件去檢視，有耐性、細心去處理： 要嘅，就整理好，清潔好，揾個好位置，好整齊咁放起佢；無用嘅就掉咗佢（以前一直留住佢，只因不捨=內觀所講嘅貪愛，但長留，對個人嘅身心發展只有百害而無一利）。 騰空出內心嘅容量，空曠咗（空氣流通咗），感官會變得敏銳（轉數快），口中食物嘅鮮味會更立體，亦更能察覺到體內（因享受到美食）微妙嘅喜悅，呢啲極微細嘅感覺，必須要整個人嘅內心平定之後（腦中無太多嘅雜念），先可以覺察得到。 （文章延伸，請稍後查看3/4及最後一頁🌿） 回想以前大部分嘅專注力都被手中嘅屏幕或腦中嘅雜念（唔喺活在過去，就喺活在未來）吸住咗，身心上極細微感覺，好多都察覺唔到。怒氣來臨嘅時候，好多時爆咗出嚟都仲未察覺到。更無可能睇清人生方向，睇到嘅都只喺一堆人哋想我點點點、家人想我點點點、朋友想我點點點、學校想我點點點、同事想我點點點、社會想我點點點、世界想我點點點。 （2/4）

內觀只喺教我哋如實觀看一切身心生起嘅現象/感受：痛、熱、凍、痕、麻痹、怒、急、靜定等等。只需觀察，觀察，再觀察，無需多加個人評語。即使feel到有極樂之感，亦只喺觀察，唔好留戀，更唔好停留喺嗰度，賴死唔走，否則只會變成下一個操縱自己心情嘅東西，從而產生另一個新嘅痛苦（都冇嘅時候，「貪愛」嘅慾念就會令我哋變得低落）。 唔知同量子力學有冇關係，當一路（以心眼）望住肉體上嘅任何感受/自己嘅呼吸（氣息嘅進出），並唔再加入任何個人評價/情感，原來佢就會漸漸縮細，漸漸縮細，漸漸縮細，變得無影無蹤，消失於虛空之中。 — 10日內觀課程內容： 🔹每朝4am起床，9:30pm前訓覺 🔹每日閉目靜坐10.5小時 🔹整整十日完全唔俾用手機 🔹頭九日，唔俾同任何學員交談（盡可能避免任何眼神接觸），可向老師發問或向幫工提出請求 🔹休息時段只能散步、梳洗沖涼、瞓覺，唔可以做任何其他運動/活動 — 🌿 持之以恆去練習內觀，令意志力增強咗，eg更容易控制自己每日只能飲一杯咖啡、每朝6AM起床：把握清晨嘅寧靜時段靜坐，觀察自己身心嘅變化、唔再因為某一句或某一個用詞去動氣、內心嘅「趕/急」消失咗。 （3/4）

意志力增強= 「果」 「因」：雜念被有意識地慢慢清除，平日生活亦盡可能唔好加入新嘅雜念，eg聽好多同自身完全無關嘅消息、後悔當初做過/無做過嘅種種事情、憂慮好多過去未必會發生嘅事情 👉🏻心靈空間寬闊咗👉🏻喘氣嘅空間⬆️👉🏻自身嘅耐性⬆️，對不如意之人事物嘅忍耐程度⬆️👉🏻自我掌控能力⬆️ 每個容器（心靈）都有上限，裝得太滿，只會爆煲。內觀教我哋點樣去清一清佢。 為咗將學過嘅知識溫故知新，久唔久會喺度分享一下喺內觀Vipassana十日課程所學習到嘅內容同個人感受。 完！ Vipassana Dhamma