關於01.18 深水埗玩具街 一開始知道速寫香港約深水埗畫賀年裝飾嘅時候，我以為會係好似一德路咁嘅一條好大規模嘅街，「如果唔係點會專登定呢個點，三個月嚟畫兩次呢？」 但估唔到係非常短嘅一細段路，賀年裝飾亦都擺得好含蓄 坐低畫之後我發現我有啲理解錯，人哋真係做街坊生意嘅，買嘢嘅人男女老少都有，有好多大人帶住小朋友嚟行，好多人拖住去書展搬練習冊返屋企嗰種車車去買嘢，有爸爸媽媽同小朋友講「嗱，買完翻去要識寫你嗰篇辦年貨作文㗎啦」 畫下畫下我開始有啲呢條街嘅有趣之處，呢條街對於當地居民嚟講，確實係好夠用，甚至其實行得舒服過一德路 — 關於01.25一德路 因為呢邊好近少兒圖書館，所以一德路我真係由細去到大。但我細個一直覺得呢個係唔屬於我嘅地方，因為呢度啲老細做開批發生意，都好唔鍾意散客嚟問價，我呢種i人如果想買唔係大路貨嘅靚文具靚玩具，就要鼓起勇氣求啲老細有冇得平少少😂 一德路真係好長，我今日都揀咗好耐要畫邊個位 今次揀呢個角度係廣州每個新聞節目，一講話「嚟一德路感受下過年氣氛」啲記者就一定會企，camera一定會take嘅建築物，入邊成棟從地底到樓上全部都係工藝品文具玩具批發商