經歷過 被出軌 之後，基本上呢一世都唔會好，傷口真係太深⋯條疤痕永遠都喺度⋯每逢翻風落雨條疤痕都會痕癢⋯陰影永遠都會喺度，我唔會呃你我已經完全好返冇曬事。 最近有朋友經歷緊一樣嘅事，我同佢講⋯亦都好想同經歷緊嘅朋友講⋯ 「你唔需要迫自己好快好返，因為係冇可能嘅事。你想喊咪喊囉！想收埋自己都冇問題！想頹廢都得㗎！無胃口都唔需要迫自己食嘢，瞓唔著就一定㗎啦，你要記住你只係個普通人。去到今時今日，我見到你嘅經歷，我再諗返起當時嘅自己，我仍然都好想喊。」 我唔會忘記，我係點樣由對一個人有好感變成鍾意。 我唔會忘記，我點樣由唔相信婚姻到希望同一個人成家。 我唔會忘記，我係點樣由完全100%相信一個人變成100%傻仔。 我亦都唔會忘記，我係點樣喊住瞓着再喊住咁瞓醒。 我永遠都唔會忘記，我點樣由破碎嘅自己再重新「似返個人」再成為一個更好嘅自己。 至於點樣重新相信愛情？ 點樣重新相信男人？ 又係另一個故事了⋯