20250124 雞春咁大隻曱甴兩頭岳 黑龍劇場 @dib.theatre 嘅第一個演出，潘惠森嘅劇本，早鳥購票嘅時候講明係「演讀劇」，唔知會係咩表演形式，但睇過alma之前嘅劇就知佢唔會令觀眾失望，所以果斷買咗飛。 先講黑龍劇場呢壇嘢，佢嘅誕生係顛覆咗我認知，我有聽過歌手自資開公司，但從來冇諗過一個演員會自資開劇團，仲要係冇任何資助，難度之高應該係我無法想像。 講番套劇，話就話「演讀劇」，但所有演員都熟晒劇本唔使點睇，而且有場景、有道具、有音樂，除咗演員有拎住劇本之外，其實同一般舞台劇冇咩分別。 對劇本嘅睇法就唔分享太多了，想等睇埋其餘兩套理解得全面啲再講。反而想講樣嘢係，我一直都覺得有熱誠嘅表演者喺台上係識發光，而我再次喺台下見證到呢種光芒。我諗舞台劇其中一個精髓，就係可以直接將呢份光明傳遞畀觀眾，而觀眾嘅回饋亦可以照亮身邊同台上嘅人。 願我們記着光明，相信光明，一齊撐到有光嘅盡頭。