第二次測量EGO MagPower Gen 3.1 「6000mAh」 嘅電池。結果冇驚喜，甚至再差咗啲啲。 【 懶人包：電池實際放電電量達到電池噴碼標示約 93%、達到機身標示容量約 80% 】 電池標示規格係 3.8V 5000mAh, 19Wh，詳情可以參閱之前嘅拆解圖文。首先透過尿袋電路板 USB-C 充電，確認充滿電之後使用電池容量測試儀，今次同樣以 2A 電流放電（放電倍率 0.4C），截止電壓 2.75V。喺測試過程後期、電池電壓去到大約 2.95V 嘅時候，電壓快速下降，不到 2 分鐘就觸發預先設定嘅 2.75V 截止電壓。 經過大約 149 分鐘嘅時間，最終電池放出 17.70Wh 電量，達到電池噴碼標示嘅大約 93%；對比機身標示電池容量「22Wh, 6000mAh」，達到機身標示容量大約 80%。 同尋日測量結果有少少差距，屬於合理誤差範圍內。 今次測試過程同樣全程錄影，大概農曆新年期間會公佈完整錄影片段。