疫情和科技，改變了出差常規。 廿多年前，大部份客戶帳目和文件均儲存在電腦或實體office，cloud技術未成熟。如果要攞財務資料，例如抽sample或者攞breakdown，好多時都要親身去客度搞。 而客如果唔係HK base，咁就預咗要飛。同埋通常個客科技越落後，辦公位置都同等落後，要有定心理準備去古怪地方。 例如係山西省唔知邊個市，除咗間廠四野無人。撞啱peak season二三月嘅時候，零下十幾度住係工廠宿舍，非常凍。 廁所係踎廁同沖涼地方無間開，極容易唔小心踩錯腳落屎氹。花灑嘅水壓非常之溫柔，呵護住你肌膚，水溫唔太熱長期保持係半溫水狀態。所以沖完涼最緊要係第一時間對住個舊式暖爐烘身，如果唔係好快變雪條。 拜雲端技術所賜，呢個客早係十年前已經將所有文件資料放咗係cloud。聽聞住宿體驗都大有提升。但係唔知大家太想體驗山西定係想見到山西布政司，所以依然會去佢廠度出差。 年年有今日，直至疫情。大家先好似當頭棒喝咁，醒覺完來唔洗駐足係人哋間廠成個月睇文件。 現在疫情過後，一切復常。但大家都唔再去山西，轉為視像會議，對住鏡頭揮揮手，問候人哋凍唔凍就算了。