見到港台湯水咁多人討論都想講一下，我由細到大飲嘅湯水主要分三大類 藥材湯:通常係病完，做嘢唔夠瞓周身痛呢啲特定情況我阿媽就會煲藥材湯，土茯苓巴戟杜仲牛大力白芷川芎當歸，唔同配搭呢類湯只會飲個湯多，會加肉或者豬骨豬尾煲，啲渣唔太會食四季都會煲 仲有一啲係病好食完西藥就會煲嘅淮山茨實或者浸瘦肉水 時令湯:多數睇季節同有乜食材當造就會煲嘅老火湯，夏天就冬瓜薏米荷葉，秋天就雪梨蘋果無花果，冬天就蓮藕豬手，椰子雞呢啲，節瓜當造就節瓜章魚，會加肉豬筒骨雞腳雞殼去煲，呢類湯就湯渣都會食。 滾湯:呢種可以叫係一個餸咁，湯同料都會食。 紅衫魚靚大眼雞靚就整魚湯加蕃茄薯仔滾魚湯，勝瓜靚就加啲花甲鯪魚肉魚蛋一煲過 屋企人公公舅父媽咪煮飯都好叻，客家潮洲台山廣東菜都食過唔少，自己大咗學埋日本料理，上網又學吓西餐，認識多咗之後知道唔同地方唔同飲食文化反映咗當地盛產乜嘢以前啲人遷移嘅種族同文化影響，再經過咁多年嘅演變。未食過嘅可以試吓，可以唔鍾意但無對同錯