《因為一盒樂家杏仁糖，中咗風嘅婆婆決定同全家人開年》［1.1］ 好喇，講下講下，轉眼就嚟到我阿婆屋企樓下。 我哋一家三口企咗喺樓下大閘外面，正準備打電話上去俾阿婆叫佢開閘，就聽到「噠」一聲，大閘已經開咗。 「新年快樂！」 異常地精神嘅拜年聲響起，唔洗講，都知道係年初一至年初三狀態最好嘅看更。 但有趣嘅係，今年個看更並唔係喺度做咗幾廿年嘅全叔，而係變咗做一個後生𡃁仔。 「全叔呢？」我忍唔住問咗𡃁仔看更一句。 「哦，佢病咗，所以我嚟替更。祝你快高長大，身壯力健，早日出Pool。」 「你又知我未出pool？」毒男最忌俾人講中要害，我有啲緊張咁樣反問一句。 「你背囊個御守囉。」 𡃁仔看更指一指我身後嘅背囊，我呢個時候先醒起，背囊上掛咗兩個我上個月去日本神社求嘅御守，其中一個正正係求姻緣嘅。 （未完待續）