由細到大 我爸爸教落 1. 「堅持先係皇道 想一件事成功 你就要努力 一直堅持 唔好放棄 能夠走到終點嘅人只有堅持到最後個個人 」 2. 世界上無醜嘅女人 只有懶嘅女人 要運動體態好 要護膚基本化妝 3. 屋企要整潔 要乾淨 你著幾靚外表幾好都無用 呢個係你對生活嘅態度 （近呢幾年佢開始講：） 4.成功唔係搵到錫你嘅男人 而係你識得享受任何狀態嘅你同生活 有愛人嘅時候盡力愛 得自己嘅時候盡力愛自己 5.唔好急住搵男人 當你識享受同自己嘅時間 有無男人 你一樣活得好開心 雖然每次見佢 佢都搵到野話下我（好聽啲講就係佢每次都提我有咩可以做得更好） 早排見佢 佢突然講咗句：「對你仲有咩好批評 你已經好好啦」 （除咗佢成日話我 咁大個人都無車牌 有啲失敗😂） 呢幾年其實我過得好差 基本上我都無咩點搵我爸爸 廢事比佢見到我潦倒嘅樣子 記得係我早幾年最差個陣 我爸爸講咗句 「你唔好靠食藥啦 得閒去做下運動 見下朋友 頂唔住想喊就打電話比我 搵下你老豆唔駛死嘅」 呢個都係我一直運動嘅原因 因為我唔想到頂唔住個陣打比佢喊😂😂😂😂