我啲親戚一向比較開放，從來都唔對人哋生活指指點點。 我有4個堂哥，1個單身，3個都結咗婚，但全部都冇小朋友。佢哋最細嗰個都4x歲，但從來冇人催結婚催生仔，仲成日講笑我哋呢輩係最後一代😅 就算講緊我老豆個輩，我阿叔到而家都冇結婚，我姑姐結咗婚但冇小朋友，但我阿嫲都係冇所謂。可能因為呢個原因，我一直都以為咁樣係好正常，直至遇見我老公啲親戚🤨 次次一食飯就催我哋生仔，又話我老爺就退休，係時候生個孫比佢玩下（真心o哂嘴😑）。每一個細嘅，都會比人催拍拖、催結婚、催生仔，仲會叫我哋細嘅要比多家用長輩。 我老公有個一個A0嘅表弟，我問佢係咁比人催拍拖係咪好煩？佢話係連女朋友都冇，就已經比人催結婚生仔🫣 除咗之前分享嘅洗碗事件，個極品嬸嬸係咁催佢兩個仔同女朋友結婚，佢兩個仔話未係時候，其他親戚就話咁生住仔先，第日想幾時結就幾時結。我聽到眼都突，如果你有個女，你係咪都可以接受未婚先孕先？ 我同老公結婚第一年，佢啲親戚已經係咁提住我哋要封利是比佢堂/表細佬妹🫣我心諗，你哋啲仔女係咪真係咁等利是錢先啊，佢哋都冇出聲，你哋就驚死蝕底咁😑 而家一見佢啲親戚之前，都要做足心理準備🙃