阮兜ê狀況是按呢 台語是阿母ê母語，伊是講台語大漢--ê 佇我ê記持內，伊kah阿媽、阿姨、阿舅講話攏是台語，細漢時逐擺轉去阿媽兜，就是我會當聽著上濟台語ê時。毋過彼陣ê我其實聽無啥有，我感覺彼是in大人leh講ê語言，我毋捌，嘛無想欲捌 佇市區生活、讀冊，學校無同學講台語 所以袂曉台語這kiāⁿ代誌，細漢時陣ê我是感覺無啥。 阿爸是外省第二代，毋過伊自細漢to開始講台語，講台語對伊來講誠實（chiâⁿ-si̍t)是足自然 阿爸阿母定定攏是用台語對話，抑是oan-ke 其實嘛to會聽in講，阿母嘛定定用台語kā我罵 、用台語叫我「Phòe-hûn」 毋過除了罵人kah叫名以外，這个語言佇阮兜，猶原是in序大人leh講爾爾，毋是規家伙仔ê共同語，嘛無湠入去我ê世界。 按呢生活二十幾年了後，才欲開始佮in講台語，愛改變，真正無遐簡單 in早就慣勢對囡仔講華語--ah，閣較悲哀ê是，in嘛已經慣勢用華語生活--ah 真濟台語詞in會袂記，無就是in ê台語嘛予華語牽去 有當時仔我會感覺，in是毋是已經袂記得按怎用台語生活？ (1/2)