喺呢度講吓個人感受先 聽到呢個消息嗰時其實都幾唔開心。《睡魔》喺眾改編漫畫作品之中，可謂係最忠於原著嘅表表者。Neil Gaiman出心出力控制作品嘅質素，喺選角同埋撰寫劇本都親力親為，盡可能呈現喺漫畫所描繪嘅浩瀚宇宙及複雜人性，同時亦唔會犧牲追看性。因此《睡魔》嘅終結對改編漫畫影視作品嚟講一定係一大打擊，唔知幾時先可以再睇到一部可以平衡到藝術同埋商業嘅作品 其次，就要講吓我嘅政治睇法。個人一直唔支持呢種未審先判嘅取消文化。取消文化嘅原意係想懲罰加害者喺社會嘅地位同埋成果，嘗試為受害者爭取公道及奪回話語權。但係呢種未經過司法程序，純粹倚賴受害者一面之詞就下結論，究竟係唔係恰當呢？歷史一次又再一次證明咗呢種行駛正義嘅渠道係有可能弊大於利，由Kevin Spacey 嘅性侵醜聞、Johnny Depp 嘅家暴爭議、再到近期Jonathan Majors 嘅家暴指控，呢啲藝人起初都因為媒體嘅報道而被封殺同埋敬而遠之，但係當司法制度證明咗佢哋係無罪嗰時，就冇人為佢哋主持公道，俾返應有嘅工作機會佢哋，甚至唔少嘅觀眾仍獵巫式深信佢哋係有罪