龍年最後一日，同屋企人食盤菜過節，一家人食得好開心 電視開住春晚節目，因為屋企人會睇，內容都係搵啲藝員歌手一式一樣咁唱下歌祝賀下 聽講話好耐無露面嘅王菲會參與其中 我冇興趣睇呢啲節目，有佢表演又如何，佢都無限期休息咗好多年了 時代已經轉變，屬於佢嘅時代已過去，只能懷愐 不過話時話，當年我無乜邊個女歌手聽得入耳，除咗佢 個人認為佢係當時最前衛獨特，音樂風格最多變嘅香港女歌手，當然好多人會話佢抄人唱腔形象同音樂風格，不過，佢的確抄得好聽，或者簡單啲講，聽佢嘅歌最有Feel，最有共鳴，有流行又有玩味，另類得嚟有時又帶搖滾，就更加啱哂我口味 其實正式嚟講，佢吾係土生土長嘅香港女歌手，只係嚟香港「打工」，況且佢好多時嘅創作班底係來自內地嘅音樂單位 佢停工休息係可惜，最遺憾係，我從來無睇過佢嘅現場演出。以前讀書無錢，但記得11年時佢嚟香港開過幾場，我都係冇去搶飛，完全吾明點解嗰陣毫無動作，咁就留下咗一個遺憾，我諗，未來仲有機會嘅 定只係一廂情願，永遠等待呢 當年買咗幾隻佢嘅唱片，但竟然無買哂儲齊，依家好多無出番，亦都係另一個遺憾 最後總結：我當年支持嘅，其實係一個內地女歌手