作為第一年有食到嘢嘅凝皓春茗（上年咁啱禁食）（今年食完發現腸胃炎未好返），當然同時係作為老師第一年出席，見到場面鼎盛，有明星高歌，有豐厚獎金獎品，最緊要係兩位美麗而搞笑嘅主持搞氣氛，見老細筆記化用唔少滕王閣序，都真係感嘆自己童子何知，躬逢勝餞。話雖犯太歲都真係有點邪，但寄望我嗰張失而復得嘅太歲符同埋旺過旺角嘅凝皓可以保佑我新一年有啲突破，meet到自己幾個小目標。每天進步1%，一年就已經37.7倍，願我永遠努力多一點點，過得健康快樂，每天積極向上多1%，不負寄望。啱啱第一年出嚟做嘢，只係乳臭未乾嘅童子，望新一年大家多多海涵、多多指教。不墜青雲之志，摶扶搖而上者九萬里，而後乃今培風，而後乃今圖南。祝大家新春大吉，靈蛇騰飛。