是日單向對話。 「17、8歲時第一次參加攝影比賽，係東頭邨攝影比賽。交三張相，全部攞獎㗎。」 時為80年代末。 「係區議員嗰啲搞。仲話一開始不記名攤哂啲相出嚟嘅時候，冠亞季都係我三張相㗎。最後咪唯有一張冠軍兩張優異囉。頭獎係一支腳架，我仲同二獎個閃光燈換。」 啲相去哂邊？ 「其中一張送咗俾嗰陣住嗰座樓嘅同事。其他扔哂啦。嗰陣仲影一大堆孟蘭節正片，都唔知去哂邊。 「而家咪後悔，當初去埋啲落後國家做嘢嘅時候應該帶部相機影相，而家影唔追。但鬼咩嗰陣有咩事都用大機做嘢先啦，邊有時間影，同埋邊可能帶埋自己部大相機周圍走，唔見咗點搞。 「嗰陣細相機只有Leica，嗰陣成兩萬銀，仲貴過隻勞，邊度買得起，買咗都唔敢帶去啦。 「冇啦，後尾唔玩就扔哂啲嘢啦，唔返轉頭喇。」 搬家嘅時候，都只係搵得另一半幾張舊照。唔覺唔覺，原來係夏韶聲。