農曆新年抖咗幾日，除咗去拜年就係行山食嘢。由呢幾日嘅觀察，發覺中小企真係頂得好辛苦。 年廿九，家父愛潮州菜，於是去咗相識多年朋友開嘅潮州館團年。伙記知係熟客，招呼十分殷勤，可以話係無微不至。食物水準都高，但竟然有碟滷水菜未全熟。事後同老闆拜年，佢分享話當夜原來已經只做一輪晚市，唔想迫客滾水淥腳趕住走。但滷水菜何解會出問題仍然匪夷所思。有可能是生意額唔夠，員工不足管控，掛一漏萬。 大年初一，家兄於港島某知名水果舖甄選兩盒水果到父母家拜年。一開盒金玉其外，好可惜下層好幾隻柑發霉得厲害，呈绿色流水。駕車去換貨，老闆當然爽快，話我哋一定年頭「發」到年尾。我哋當然樂意照單全收。 晚飯，係父母家附近聚餐。餐廳生意額一般，目測大慨五成滿。大家觥籌交錯、大快朵頤。席至甜湯，紅豆沙湯圓，一口咬落呈粉狀，明顯未解凍未熟。着廚房再煮，又花時等八個字。 短短兩日，幾處消費，已可見不同甩漏。以上皆非嚴重錯失，所有老闆們也是多年好友或熟客，重人情，絕唔會厚此薄彼。但可以想像到生意一定係困難重重，一環扣一環，先至影響到出品。 望大家新的一年「純如鴿子，靈巧如蛇」。｜