（沉淪） 雖然賭博禍害咗我屋企，但對賭我無好厭惡嘅感覺。有次去馬會買六合彩，俾職員說服下開咗個馬會ac 。馬我唔識睇，波叫做識啲，但因為做過馬會part time，點樣投注我好清楚。一開始賭個陣仲係學生，所以上落都係幾十一百，其實都係貪玩玩吓，有時仲會贏到啲錢，可以買吓嘢。 但慢慢注碼開始越來越大，因為壓力、因為心急想有多啲錢還債，亦想搬出去住，但事與願違。不過人嘅心理就係咁，一輸就想追，但只會越輸越多。每個月我都用咗好大部份嘅錢去賭，一有錢就拎去賭，結果可想而知，我一蚊都儲唔到，淨係想追數。投注嘅銀碼對我嚟講唔係錢，只係一堆數字，注碼越來越大我已經冇感覺。 如果唔賭錢，我每個月還錢之後仲係好鬆動，但因為賭，我開始還唔起自己本身嘅債務。一開始問銀行借，借唔到就開始問財務公司，借返嚟嘅錢又係揮霍同賭，身邊完全冇人知道我爭落咁多錢同埋染上咗賭癮。 雖然我知自己咁樣係錯，但我搵唔到人可以傾訴同幫我，任由自己沉淪。