月頭，正正係屋企要使錢嘅時候，我老母新年前因為話俾老細鬧得好甘，就咁辭職。我老竇又唔係搵得多，又鍾意賭錢，父母都冇儲蓄。靠我老竇一個供樓同交我學費就一定搞唔掂，於是我老母得出解決方法就係叫我唔好補習，唔好學琴，佢嘅理由係因為見唔到我練琴，屌咩？之前佢返工又見唔到我練，新年出街唔喺屋企又有幾日無練，加上我中間隔咗大半年啱啱學返冇耐，點都要時間pick up吧？又換咗個新老師，升咗級，啲歌難，仲啱啱先適應個老師嘅教學方式，佢轉個頭就同琴行講退學，話因為學費太貴。咁我想問點解佢可以因為啖氣而辭職？我唔係話一定要俾我學，但係細個自己唔想學佢逼我學，到今時今日學到高級，學費貴啦，你一句冇錢就叫我唔好學？仲話我琴阻住晒，話要賣咗部琴。嚟緊三月校際，佢話睇我都唔會攞到獎，學嚟更加係嘥錢。吓？又係你話參加比賽唔係自在攞獎，話係一個機會練習上台彈，同佢坳佢話「嗰啲都係細個氹你咋」咁乜都係你講晒啦。日日返到屋企就喺度黑面，話我嘥錢，佢付出唔成正比，話後悔生我。咁你咪咪撚生我，你估我又想出世？你生我都冇問過我。