（沉淪2） 我開始過上渾渾噩噩嘅日子，返工放工，每日諗追數，有時做緊嘢都忍唔住拎電話出嚟投注，仲要俾同事見到。但已經成癮嘅我改變唔到自己，越賭越大、越輸越多。嗰時我人工有4萬左右，但欠債已經近百萬，基本上都係因為賭而輸嘅錢。 每次唔夠錢還，我就諗住借一筆大嘅重組，之後就生生性性做人。錢係借到，但人就改唔到。每次借完返嚟，我都係重蹈覆轍，好快將啲錢輸晒。之後就開始驚、開始後悔。驚係因為咁大筆錢可以一下冇晒、而且自己欠債變得更多。後悔係因為自己明明有機會重新開始，但唔識珍惜，爬返出個氹都要再踩返入去。而家諗起，我後悔嘅仲有唔早啲同屋企人坦白。因為驚俾人鬧，驚屋企人對我失望，明明有板睇都要行同一條錯路，我一直唔敢開口同任何人講。事實上呢個時候我仲係可以靠自己還債、只係每個月都儲唔到錢，同埋生活費所剩無幾。但只要我敢講，有人督促下，好可能我而家已經成功脫胎換骨，但我冇呢個膽量。 所以喺佢哋面前我要扮冇嘢咁，照俾家用、出街因為我賺得多，好多支出都係由我出，雖然好吃力、但我唔可以表露一分一毫。