（沉淪3） 期間我有嘗試振作，開始去做運動、學新嘢去令自己唔好再諗賭，將啲錢用係更有意義嘅地方。係有一段時間好轉咗，個人正面、積極咗，開始有目標。 但就係呢段時間我迎嚟咗雙重打擊。首先係我發現一齊咗7年嘅另一半疑似出軌，點解係疑似，因為佢一直都否認，而我又冇好實質嘅證據。我一直住係佢屋企，7年期間係有好多爭吵，但佢都陪我渡過咗好多困難嘅時刻，所以我都認定咗佢。但我發現佢同一個異性同事會特登用另一個app傾計，仲單獨去街，朝早打電話叫佢起身等等。 同時我係呢段時間發現阿媽借咗好多2、3線財務（承接上幾個post)，最後冇人幫到佢，唯有破第二次產。我出錢又出力，陪阿媽去搞破產。但啲財務公司唔會理你照追數，我成家都不停收到追數電話同WhatsApp ，block 極都仲有，嚴重影響到工作同日常生活。同時間太多打擊，我差啲承受唔到。屋企嘅嘢我一直只敢同另一半傾訴，但呢段時間我同佢講任何嘢，佢都只係話咁都無辦法，叫我唔好理。但感情嘅嘢我又唔敢同屋企人講、同朋友講又唔想講太深入。 個時每晚都淨係識喊，覺得自己冇任何support，所有問題都壓到我唞唔到氣。