（沉淪4） 幫阿媽搞完破產都算叫解決咗件事，起碼唔洗再諗點幫佢還錢，而且佢唔會再借到錢。而感情方面，我最終亦原諒咗另一半無再追究，因為我真係唔捨得放棄咁多年嘅感情。 但個一段時間真係好大壓力，每晚瞓唔好，亦覺得人生好似冇咩意義同追求，成個人都憔悴咗。雖然緩解壓力有好多方法，但我又再選擇賭錢。馬會app del完又再下載，完全只靠運氣去落注，輸錢就諗追數，到追返打和就諗贏錢，贏到少少又唔肯停，係要到最後輸晒先安樂。嚴重起上嚟係輸到一出糧就冇錢，係連生活費都唔剩。所以我嘅社交變得更少，放假都只會留係屋企瞓足一日。但咁樣只係令自己更加消極，更加冇動力去做任何改變，只有深深嘅空虛同茫然。 慢慢我開始還唔到錢，就問細妹借，到出糧再還俾佢，起初佢冇問任何嘢，但頻率變得越嚟越密佢都有懷疑。不過因為每次都只係幾千蚊，佢都冇深究。呢個階段我只有向細妹借過錢，冇向其他屋企人或朋友借，只當每個月透支幾千蚊，下個月還返就可以。就係呢個諗法令我錯得越嚟越離譜。