（沉淪5） 可能係受父母影響，我對理財冇任何觀念，金錢觀亦被扭曲。或者有人會反駁呢一點，出身差就更應該發憤圖強、力爭上游，而唔係將自身嘅失敗歸結於出身。 事實上我冇因為出身而仇恨自己嘅父母，我亦想好好過自己嘅人生，靠自己去改變命運。我由畢業到工作開始都叫順利，但因為屋企狀況不斷，我累積唔到財富之餘，仲想用錯誤嘅方式去翻身。因為當你每行一步，諗住慢慢前進，但總會發生唔同嘅事逼你倒退幾步，你就會覺得到底努力有咩用。放棄永遠比堅持容易，雖然我嘅失敗歸根到底都係因為自己，但原生家庭對一個人嘅成長發展真係好大影響。有人話窮人唔好生仔，但窮唔係重點，又窮又冇愛先係重點。可能我父母生仔只係為咗傳宗接代，但就冇諗過要灌輸咩價值觀去教育我哋，避免我哋再過上咁失敗嘅人生。 有時我會諗，呢個係咪我上世種嘅因，因為我欠左佢哋，今世要嚟還。但還到幾時先係盡頭？有時亦會諗，係咪只要我由一開始就狠心唔理佢哋，今日嘅結果就會完全唔同？但正因為我相信因果，我唔想當我有事冇人幫，我將來嘅子女都同樣對待我，我選擇去接受呢一切，但就高估咗自己嘅承受能力。