被遺忘的幸運兒 （前傳） 早兩日有位網友dm 我， 原來佢都係同我一樣， 順產生完2個之後先突然間發現自己有先天性心臟病， 依家搵緊唔同嘅治療方案 包括諗緊同我一樣係瑪麗做開心大手術 所以就係上網搵資料嘅時候搵到我😆 嗰晚我地傾咗足足3個鐘頭電話 明明係素未謀面 但真係好似識咗好耐嘅朋友 （一問之下發現佢都係人馬座，怪不得！） 一般人係知道自己有大病嘅時候 通常都係諗： 點解係我？ 六合彩又唔見我中？ 點解會咁唔好彩，明明我都唔煙唔酒？ 而我哋係心諗： 真係好好彩， 原來我地係被遺忘的幸運兒🙂‍↕️🙌🏻 如果我哋一早知我哋有心臟問題 可能我哋會小心翼翼咁過活 唔會嘗試到玩過山車 去墨西哥潛水 去西藏玩一頭半個月 去歐洲exchange 考埋paragliding 牌可以自己飛 體驗過自然分娩有幾痛 至少，係我體驗過上面所有嘢之後 我仲冇事冇幹生存到 而且，我哋嘅病係現今醫學上， 係有得醫… （下回續）