針山十登aka啪十針(+沙田郊遊徑500m） 2024年3月9日 當年因為新冠疫苗打針，啲人都將針山n登講笑做啪n針 未跑山前已經聽過啲人攞「針山十登」嚟講笑 因為針山算係香港上得比較急嘅一座山 後來先知有啲跑山嘅人真係會做「針山十登」 其實跑得山，都有唔少跑山人士係瘋狂嘅 本來我覺得「針山十登」好悶，同一座山連續上 10次 但個綽頭幾好聽 所以一直冇做但又記喺心中 直到有一次我自己用個拮拮波按摩腳底，按摩得太勁 整到腳底腫咗幾日，好似有粒蛋喺腳底咁，行行企企都痛，過咗幾日消腫咗啲，但跑都太痛 但係我又習慣咗每星期都郁下，所以我決定玩「針山十登」‼️因為慢慢齋行唔跑都可以消耗下唔少精力😂 用咗10個幾鐘，連同上沙田郊遊徑，必然係唔快 但我玩呢啲非比賽嘅挑戰路線都係但求完成 一年後，記錄下自己曾經瘋狂嘅一日