由細到大，我都係一個冇運動細胞嘅人。小學陸運會跑200m，去到一半我已經要行返終點；中學PE堂跑9分鐘，我一定會叫同學剔多幾個圈扮達標；有邊個會諗到，我有日會喺半推半就之下，同同事一齊報名跑渣馬10k。 重記得第一次練跑，跑唔夠300米已經氣喘肚痛，爭啲要搭的士返屋企。之後學習調整呼吸同步速，慢慢搵到自己嘅節奏。雖然練跑嗰陣不斷比其他師兄師姐爬頭，但每次我都會諗，至少我今日有去跑吖！ 所以我好鍾意PB呢個term。因為跑步教識我嘅，係唔好同其他人比較。我要超越嘅，只有以前嘅自己。今次10k嘅成績對好多人嚟講好慢好慢，但已經係我嘅PB。原來只要肯落場，嗰啲baby steps係真係會令人進步的。 最後，要多謝一班攝影大佬影到我咁精神，所以我睇到preview即刻毫無懸念課金！明明我衝線嗰刻已經冇哂力，格硬擠緊個笑容出嚟lol ->😬