（心癮） 賭到最後已經變咗病態，理性層面知道唔會贏錢亦唔會追到數，但就係控制唔到自己。因為賭已經變咗癮，寧願晚晚捱夜唔瞓都要賭。 有一次同朋友去澳門玩，亦係人生第一次入賭場。奇怪嘅係我覺得大細一鋪500$好大，但係馬會用幾千買一場波我又唔會咁諗，可能真係要有錢係手，先會真正意識到錢嘅重量。興幸賭場嘅紙醉金迷並唔吸引我，否則我只會死得更快。 慢慢因為賭錢，我開始負擔唔起負債。因為成日亂借錢，同埋負債多，我嘅信貸評分好低，已經再借唔到錢或者整合債務。走投無路之下我選擇向另一半坦白，感激嘅係佢最後都願意借錢俾我去解決少部分嘅債務。但心癮一旦形成，唔係咁易就戒得甩，而家每次一諗起，我就會好後悔冇好好珍惜呢次機會，亦會好憎自己。因為當解決咗眼前嘅危機，人就會變得鬆懈，亦有僥倖心態，以為過得到呢關就過得到下一關。好快我又再沉淪落去⋯⋯