尋晚《弊傢伙！我要去祓魔 》第六集 你的名字我的八字，睇完極好feel！ 眼見拜兩點所賜：劇情由起伏極大，另外一眾男角表現大爆發。 起首許晉邦飾社畜毒男梁樂寬一段笑中有淚，俾車撞而轉生、去到異世界要搵公會、技能醒覺、後宮番，一系列中二病極重的用詞，近年睇咗大量轉生作品的話必定識得笑，也不禁投射自己而感到同情。 去到阿寬因為想報仇、上咗阿神 曾贊學飾既紋身佐既身，再次出現喺男一強尼飾既毛無邪面前，真係今集高潮所在。相信以阿神性格，知道要車強尼大哥咁多巴，前幾晚應該訓唔著，但見佢越打越大力，真係豁咗出去。而佢將整段阿寬銘記通靈王既心法既對白悲憤地完整講晒出來，見到比咗好多心機。 而對手強尼今次既output都非常強，為咗要救一對徒弟，用盡所有力氣去道歉、去游說，感受到佢對於自己既過錯以及眼前傷害過既人有幾咁懊悔，坦白講真係好少見到強尼大哥既眼神咁有火。 今次劇本既鋪排亦見更見延續性，最尾喪波同零講原來借款全部由端木圓欠下，毛無邪卻一力承擔，更加追下一集去了解佢地既往事同關係，呢套算近期作品嚟講終於有番想追既感覺。