心嘅相續，影響同代表住一個人嘅自我認同，意識嘅連貫性建立起「我」嘅概念。假如我嘅記憶被打斷，自我嘅認知都會崩解。換句話說，係記憶建構起一個人嘅自我認同。 坐監兩年終於令我明白，一個人嘅意義係會隨環境脈絡同背景所改變。就好似一本小說裡面，「我」喺缺乏前文後理嘅情況下係冇意義，唯有賦予佢故事，「我」先有意義。有啲類似社會建構論講嘅嗰種自我。 假如故事係線性嘅，敍事、被敍事同閱讀嘅都係同一個人，本來正常情況下係應該冇嘢嘅，但坐監就好似take咗一場long trip咁，呢段trip嘅時間會被放大，情緒都會被放大，記憶會不斷回朔，不可自控地會回想某段過去。不過因為唔係真係take咗嘢，所以我哋對時間嘅感知雖然感受到分別，但嗰種分別又係喺身體比較可以接受嘅範圍裡面。有睇過《單身即地獄》應該會明，短短七日裡面嘅各種情緒已經會被放到好大，更何況係以年計。 一直覺得呢段經歷好難以文字形容，因為實在好難搵到適合嘅比喻，但或者我能夠敍述出嚟，都係實踐緊作為一個行動主體嘅主動性同行動力。