講下ON呢個牌子 開返一個月，已經有三個人問。本來諗住簡單地：「我無拎出嚟推薦俾大家就即係對鞋唔好」。但為咗大家對腳都係要點名講一下。 首先要俾返credit佢，近代嘅佢已經比第一代「好咗」，第一代中底柔軟摺得埋，鞋底兩排窿bb仔都㩒得扁。一著上去對腳會比原本嘅偏歪再歪多好多。 今代拎上手，中底已經硬咗。可惜佢嘅賣點（啲窿）就係佢嘅弱點，即使鞋底啲窿佢用咗硬少少嘅物料去做，因為個窿都實在太大，俾力落去仍然有大幅度嘅壓縮，會令雙腳左右搖擺嘅唔穩定性提高，容易產生肌肉同關節勞損。即使用埋鞋墊都會被拖累而產生問題。 其實同樣問題嘅鞋多如天上繁星。情況就好似同醫生、營養師行百佳，去到零食嗰一欄問佢地邊啲零食會「食完好健康」一樣，應該九成九九佢地都唔會推薦。 總之，無話唔可以著呢啲鞋，正如無話唔可以食熱浪，但at your own risk。