「17年前喇，嗰年我仲住緊係元朗啲村屋嘅地下，會餵下街貓。佢哋嘅爸爸媽媽，就係其中兩隻我餵開嘅貓。某日見貓媽媽大左肚，我就係屋企整左個小產房，俾貓媽媽安胎，生bb同照顧BB。結果一胎4隻呀，不過貓媽媽始終係街貓卦，總係想帶走啲bb，最後都係俾貓媽媽成功帶走左啲bb，就只淨番阿大係我屋企。我成條村不斷跑不斷跑去搵BB，搵咗一整日，嗰時啲bb得1個月，太細隻好難搵。直至看更話，聽到垃圾站有個綠色垃圾桶入面有貓叫聲，我就拔腿衝去，一袋一袋一袋垃圾打開嚟睇打開嚟搵，終於搵番一隻，就係阿豹。好彩佢叫得大聲，否則真係搵佢唔到。」 年月過，兩小見證媽媽搬屋，結婚，媽媽形容阿豹同阿大係好好感情嘅兄弟，阿大驚青小膽易緊張，阿豹就外向好動兼且熱情。眨個眼就17年，對人對貓都係長長嘅時間，堆積住好多生活點滴同回憶，媽媽話兩兄弟都玩少左了，但依然經常跟實爸爸媽媽。皮叔叔祝兩隻小兄弟，一齊健康，一齊無憂，齊齊快樂地慢慢老去。 寵物攝影