而叉燒邊位燶邊喺師傅切果陣又將陣焦香帶落舊叉燒度，滋味十足，總體嚟講都算上乘之作。 . 「筍尖鮮蝦餃」，$38 . 夾起蝦餃，當然件餃皮係唔會穿底。蝦餃皮面數到十二摺，顯示到呢間中菜廳點心師傅有幾好功架。（傳統上蝦餃摺數越多越好，以十三摺為最佳。摺數多寡會影響餃身喺蒸果陣嘅疏氣程度：疏氣越多，餃皮越難整穿，餃身亦越易蒸得飽滿。）食落口蝦身爽彈，肥豬肉亦無喧賓奪主，唯獨荀粒太細，失卻爽脆口感。 . 「帶子蒸燒賣」，$38 . 師傅將一塊帶子片薄放上燒賣面頭，蒸出嚟嘅鮮味就入晒燒賣下面舊肉餡度，咁做亦可以提升燒賣嘅賣相。夾起身，燒賣皮乾身唔痴住碗筷。 . 舊肉食落口，師傅好細心咁分開兩種肉去搓肉餡。一邊係用絞好左嘅肉碎，一邊係切成方丁嘅肉粒，咁樣做就可以保持豬肉本身纖維嘅口感同肉汁。亦唔似坊間堆連鎖外賣點心店咁全部用雪藏免治豬肉打成餡，咁成粒燒賣個咬口就變左實心，保持唔到肉汁亦無其他配料提鮮或者掩蓋困陣雪味。逸東軒嘅燒賣一口咬落就有豬肉粒、蝦同帶子，將豬肉同海鮮嘅鮮味集於一身。 (2 / 3)