讀書嗰陣，睇過一場歌唱比賽嘅初賽。 當時有位怕怕醜醜嘅文靜look師兄，揀方大同嘅《黑白》參賽，話想唱比在場嘅一個女仔聽。 「你是我愛的女孩 最愛的女孩 帶我到溫柔的默片時代」 每到副歌呢兩句，佢就會情深款款咁望住個女仔，唱得特別落力。 坦白講，師兄唱得非常一般，亦因此非常唔一般。 一個人，為另一個人，用心做一件自己無把握嘅事。知其不可為而為之，兩字記之曰：「浪漫」。 師兄最後無緣決賽，亦無抱得美人歸，浪漫有時真係無乜用。只不過，無用係一時，記憶係一世，浪漫就係咁爽。