前幾工讀著這篇新聞，一直袂記得提出來討論。有一个教外國人華語的，有學生問伊講：華語的「鹽巴」的「-巴」是啥物意思？ 記者查了教育部華語詞典，發現「-巴」會使用來形容兩種特性。 1️⃣ 會結規丸的物件。如：「鹽巴」、「泥巴」、「鍋巴」。 2️⃣ 掛佇下跤抑是後壁的物件。如：「尾巴」、「下巴」。 這講著一个較少人注意著的，就是「構詞」（morphology）。 而且看頂懸華語詞典的例，咱會使做出一寡觀察： 📍 「-巴」是一个「無自由詞素」（bound morpheme），就是講：伊袂使家己提出來用，一定愛接佇另外一个詞後壁。（這語言學叫affix「後綴」）。譬如講人若有一个會結規丸的物件，華語嘛袂使講「*他有一個『巴』。」 📍 「-巴」表達的是一種特性，無明顯的意思。像這款抽象詞素，會入去到語言系統的上深彼層。這代表講：華語母語者（包括嘛講原客台的雙語/多語者），若講著頂懸彼寡詞的時陣，會自動知影愛加「-巴」。毋過咱誠僫解釋 (1)「-巴」是形容佗一款特性， 猶閣有(2) 有用著「-巴」的詞，全部有啥。 譬如講：有一个華語詞無出現佇頂懸的例，但是其實嘛有用著「-巴」。恁敢知影是啥？（續）