今日想分享一則不愉快嘅經歷，希望大家可以引以為戒。前年年尾，我嘅寵物Kingsley「畢業」，屋企頓時變得冷冷清清。為咗紀念佢，我哋決定訂製一個手工毛公仔。當時，我哋俾商家嘅廣告吸引住，好快就向依一間睇落好專業嘅店舖查詢。商家用「改到你滿意」做招徠，我當時心情低落，冇諗太多，雖然價錢好貴（HKD$5000），但諗住一分錢一分貨，就咁full paid咗。 等到初版完成，賣家話已經完成九成，問我哋仲有冇細節要改。我開始覺得商家當我哋係傻仔，但諗住佢應承會改到我滿意，就冇計較咁多。我好努力咁形容我想點樣修改個公仔，改咗兩版，但到最終版我仍然非常唔滿意。我明白做生意唔容易，就希望商家扣除成本後退返餘額俾我。點知商家開始搬龍門，話個公仔已經符合我嘅要求，而且訂單已經做咗好耐，唔可以退款。呢啲完全冇喺條款上提過，而且佢網頁明明寫明最終版本如果唔滿意可以退返50%。最離譜嘅係，商家仲講埋咩「讓Kingsley返屋企」呢啲情緒勒索嘅說話，真係令人心寒！ 我以為自己係個別事件，諗住上網抒發吓，甚至提醒其他有寵物嘅朋友唔好中伏。

但原來呢個並唔係個別事件！有其他香港同台灣嘅朋友都喺我個thread留言，話佢哋都有類似經歷。我翻查記錄，發現呢間公司一直打住「本土製作」嘅旗號，喺香港、台灣、新加坡、馬來西亞等地進行詐騙。台灣嘅朋友話佢曾經舉報過，相關部門去巡查時發現呢間工作室根本冇公司在營運。 而如果香港冇成立過公司，跟本完全冇執法機構可以監管佢哋。佢哋嘅IG帳戶自2023年成立，已經改名四次，可想而知佢哋係靠不停詐騙按金（全數50%）嚟營運，交啲四不像嘅垃圾貨俾客人，就算客人唔滿意，佢哋都照賺按金。我覺得呢種風氣唔可以助長，希望透過唔同寵物平台宣揚呢間惡劣商家嘅手法。 如果你都有類似經歷，不妨喺我個thread留言，分享及轉發，利用流量密碼宣揚佢比更加多人知。同時如果可以，請幫忙在社交媒體舉報他是詐騙帳戶，因為利用主人對逝世寵物嘅愛去行騙實在太可惡，係對主人嘅二次傷害。