見到最近討論韓國金某嘅新聞，諗起一啲往事，覺得原生家庭嘅影響真係好大，細個屋企破裂時，屋企人成日都會話送我去寄宿家庭，有時又話一齊去死，細個嘅我變得好冇安全感，好驚被人拋棄，好驚會失去親人，好難信任人，同屋企人去茶餐廳食野如果佢地要去洗手間，我都會要佢地放低錢先可以去，因為驚佢地會一去不返。隨住年齡增長呢種焦慮感有慢慢減少，不過我發現自己有另外一啲奇怪野，就係會對男老師有難以形容嘅感覺，並唔係每一個男老師我都會有呢種感覺，印象最深刻就係我中一同大一嘅時候分別對男老師有一種愛慕之情，因為佢地好溫柔，我會想再親近佢地，我到依家其實都理解唔到自己點解會想同佢地有進一步發展，可能真係童年缺失所影響，但個種單戀嘅感覺其實我都幾享受，不過所幸嘅係我嘅老師會同學生保持適當距離，如果唔係我都唔知會變成點