點解我咁討厭飲酒，甚至一滴都唔想掂？ 今晚，我老豆又飲到不省人事咁返屋企 額頭、眼角唔知喺邊度跌到損哂，成件衫都係血 銀包呢？不知所蹤 行步路都冇力，要全家拖住佢去張梳化瞓住 佢呢就成個人都飄飄然，喺度自言自語，一時就講下粗口，一時就嗌哂好痛 全家人圍住佢，同佢搽藥油黏膠布，真係好似有班宮女喺度服侍個皇帝咁樣㗎😌 不過今晚咁嘅陣仗已經算輕微 我做人二十一年以來，已經見過唔少啲咁嘅場面 三歲嗰年阿媽攬住我喺房，鎖門唔畀佢入，佢就一捶打爆個玻璃窗，成手都係血 十五六歲嗰年就攤喺個客廳度，嘔到一地都係，連我部iPad都瀨嘢 總之就係鑊鑊新鮮鑊鑊金 不過每次飲大咗返屋企都有一個共通點，就係佢一人快活，要我地全家同佢執屎🤡 講真，如果唔係見我媽要一個人搞掂佢啲嘢，我真係唔會想理佢 同親啲親戚食飯就仲搞笑，次次都叫我坐埋去「男人」嗰枱，同啲叔伯飲番杯，我拒絕佢 佢仲同班親戚講話「個衰仔唔肯飲酒激死我」 首先，喺我受過嘅教育裡面，男唔男人呢樣嘢係由染色體決定，就同飲酒冇乜關係 其次，喂大佬啊，唔好玩啦，廿一年嚟我對飲酒呢樣嘢嘅印象就係你而家咁嘅款，睇住你飲到好似變咗白咭咁，我點飲得落口啊？ （續）